Agar Hum Youn Hi Katra-Katra Khali Hote Rahe......

Anshu

Agar hum youn hi katra katra khali hote rahe,

Apni saari sokhiyan bhi agar khote rahe,

To ye mumkin hai ki ye dil bhi behekna chod de,

Dhadkane dhadke magar wo bhi machalna chod dein,

Mann bhi apni seemaon mein hi khud ko saadh le,

Soch ko kas kar kahin ek kone mein hi baandh le,

Aati jaati saanson mein bhi zindagi ghutati rahe,

Hum bhale jeete rahein par zindagi marti rahe,

Sab samet kar bhi hum khali ke khali hi rahein,

Saari duniya ki sunein par phir bhi kuch na keh sakein,

Baat ho laakhon magar ek shabd ko tarsa karein,

Hungamon mein khoye se khamoshi mein tanha jiyein,

Yeh agar hota raha to sab simat sa jaayega,

Zindagi hogi magar zinda na koi reh paayega,

Hum jo khali ho gaye to, kisi ko  kya bhar paayenge !!!

Apni khali aatma se kisi ko kya hum paayenge,

De sakenge kya kisi ko apni chintan mein jagah,

ya banenge kya kabhi unke hi chintan ki wajah,

Par nahin!!! yeh sab na hoga !

Kuch bhi pehle sa na hoga ,

Hoga bas ek khalipan sa,hum mein jeeta saans leta,

Hum usi mein kho jaayenge,duniya se door ho jaayenge…….

Main Tumse Milne Aaoongi......

Anshu

Suno !!!

Tum yaad ye rakhna,

Main tumse milne aaoongi,

Jab raaton ke saaye raat ko raaton sa rangte hain,

Jab chanda-chandani bhi pyar ki hi baatein karte hain,

Dhara ka mann bhi jab kuch shant sa,khoya sa hota hai,

Ye poora hi jahaan jab neend mein soya sa hota hai,

Ye taare bhi na jaane kis jubaan mein kya kuch kehte hain,

Chamak kar,timtima kar na jaane kya baatein karte hain,

Hawayein bhi kuch alsayi si peron par hi soti hain,

Sehem kar shaant si har patti bhi khamosh hoti hain,

Inhin raaton ke saaye mein, main tumse milne aaoongi,…..

Bhale pratyaksh na paaya magar sapnon mein paaoongi,

Gadhoongi main tumhein apne vicharon ki hi maati se,

Bharoongi praan tum mein apne bhawon ki syahi se,

Miloongi main tumhein har raat khwabon ki hi waadi mein,

Tumhara saath paaoongi main apni kalpanaon ki ghati mein,

Mera intazaar tum karna,

Main tumse milne aaoongi…….