Khwahishein! meri badi masoom si hain......

Khwahishein! meri badi masoom si hain;
Nahin chahiye use heere ki chamak
Nahin chahti wo apne purush ko ghutno par jhukana;
Nahin maagti wo sansaar ka aishwarya
Aur na hi use poojit hone ki abhilasha hai
Khwahishein meri!chahti hai wo maati jismein uski jarein panap jaayein,
Use chahiye wo aakaash jismein uski aashayein unmukt ho paayein,
Use khwahish hai ek ghar ki jiski seemaon mein wo bandh jaaye,
Ek rasoyi  jahan uski grihasthi ek aakaar paaye,
Nahin chahiye use heere-moti ke alankaar,
Use wo sringaar chahiye jo uski samwednayon ko de ek naya wyawahaar....
Wo premi aur premika ki sangyaon se vibhushit nahin hona chahti,
Use purush aur naari ki dhamniyon mein jwalit unmaad ki pyaas hai,
Use prem ki sheetalta ki chaah nahin,
Wo dagdh adhron ke daaron taap mein swayam ko paati hai,

Wo shabdon mein abhiwyakt anhiwyaktiyon se tript nahin hoti,

Use akathya anubhutiyon se sarokaar hai,

Use zindagi mein bhawon ko nahin jeena ,

Apitu bhawon mein jeevan ko jeevant karna hai,

Nahin chahiye use premi-premikaon ka premalaap,

Use prakriti aur purush ke ardhnareshwar roop se sakchatkaar mein vishwaas hai,

Khwahishein! meri nahin chahti unmukt hokar bhi pinjarbadh hona;

Wo chahti hai swakchand hokar bhi qaid hona;

Khwahishein !!!

Use qaid kar ke bhi na koi baandh paaya hai;

Aur jisne use aazaad kiya usi ne uska marm paaya hai…….