Nazar....

Mohabbat ki nazar ko nazrein hi pehchaan sakti hain;

Nazar mein hi to un nazron ki, beshaq jaan hoti hain;

Nazar se hi janam lekar mohabbat dil mein palti hai;

Nazar se hi kabhi girkar mohabbat dil ko khalti hai;

Nazar se jo kabhi dekho to un nazron mein jannat hai;

Nazar ki hi nazar hoti nazar mein palti mannat hai;

Nazar ki baat mat karna,nazar bebaak hoti hain;

Nazar se baat karte hi nazar betaab hoti hain;

Nazar hi to duaaon mein khudayi ko manati hai;

Nazar ki ek nazar mein nazrein khud ko haar jaati hain;

Nazar ko jab jhuka kar koi phir nazrein uthata hai;

Nazar ki is adaa par nazron ko phir pyaar aata hai;

Nazar mein basti nazron ko zara itna zata dena;

Unhein humraaz bankar raaz ye chupke bata dena;

Nazar mein janm leti hai mohabbat, dil mein palti hai;

Nazar ka maan hoti hai kabhi abhimaan hoti hai;

Nazar mein hi samarpit si wo arpit khud ko karti hai;

Nazar ki prerna bankar wo kalpit khud ko karti hai;

Nazar ki aas hoti hai who ek vishwaas hoti hai;

Nazar mein ek hokar dono ka aabhaas hoti hai;

Nazar mein janm leti hai nazar mein hi fanna hoti

Nazar mein hi wo apni zaat ka ehsaas hai khoti;

Nazar se nazron ka lamba safar hi unki niyati hai;

Isi mein unki bhakti hai,isi mein unki mukti hai……..