Par Zindagi ki khatir hum zindagi nahin ban paate hain.....

Anshu

Hone aur na hone ki kashmakash mein Zindagi barbaad hai !

Kuch hokar bhi nahin hai aur wo jo nahin hai wo hi har kahin hai...

Zindagi ko jitna suljhao ye utni hi ulajhti jaati hai;

Woh jise humari talab bhi nahi humein usi ki kami khal jaati hai....

Kya hai ye Zindagi aur kya hai ye jeena !

Zindagi ki hi khoj mein zindagi ko nahin jeena....

Jab sab kuch paakar bhi hum santosh nahin kar paate hain,

Kabhi ek ghoont paani mein hum amrit sa sukh paate hain...

Aate hain ghoom chaaw se saara jahan hum masti mein;

Par phir bhi khud ko khojte hain dhool bhari basti mein....

sapno ki duniya ke liye sapno ko hi bhool jaate hain,

Jise chahta nahin hai mann usi ke gun hum gaate hain....

Jeete hain ghut-ghut zindagi ko zindagi ke aas mein,

Bas beet jaati zindagi jeevan jeene ki pyaas mein.....

Paane ki daud mein hum sab ko to paa lete hain;

Par phir bhi apne aap ko bas khojte reh jaate hain....

Zindagi ki khoj mein khud ko bahot bhatkate hain;

Par Zindagi ki khatir hum zindagi nahin ban paate hain.....